ALSA participa no programa de viaxes gratuítas para estudantes da UE

Madrid, 29 de marzo.- A compañía española de transporte de viaxeiros ALSA vai participar no programa de viaxes gratuítas para estudantes da Unión Europea "Move2Learn, Learn2Move", (Móvete para aprender. Aprende para moverte), que foi presentado o pasado luns en Bruxelas para celebrar o 30 aniversario do programa Erasmus, co obxectivo de impulsar a mobilidade dos mozos europeos.

A iniciativa, que vai contar coa colaboración de ALSA, consiste en financiar, mediante axudas e descontos aos participantes grazas aos acordos con 19 compañías europeas líderes no sector de transporte, viaxes entre países da Unión a un mínimo de 5.000 e un máximo de 7.000 estudantes de entre 16 e 19 anos. O programa ten como finalidade afianzar o sentimento de pertenza a Europa e concienciar sobre a loita contra o cambio climático.

Para participar no programa, que se desenvolverá desde agosto de 2017 e ao longo de 2018, os alumnos deben inscribirse no programa de cooperación eTwinning, que promove proxectos educativos poñendo en contacto alumnos de centros escolares de diferentes países. Os mellores proxectos serán os seleccionados para o programa "Move2learn, Learn2Move".

Os gañadores recibirán unha axuda de entre 350 e 530 euros, para gastar nunha viaxe, xa sexa coa súa clase ou de forma individual, de non máis de dúas semanas a outro país europeo, utilizando sempre os modos máis respectuosos co medio ambiente, polo que se exclúen viaxes exclusivamente en avión por ser moi contaminantes. ALSA, ademais, ofrecerá descontos especiais aos participantes.

DESCUBRIR EUROPA

Segundo a comisaria de Transporte da UE, Violeta Bulc, "o transporte non consiste en utilizar estradas, buques ou autoestradas, senón en que poidan desprazarse as persoas. Queremos brindar aos mozos europeos a oportunidade de descubrir Europa. Tamén queremos alentarlles a viaxar de maneira respectuosa co medio ambiente, que é a razón pola que van a terse en conta as emisións de CO2. Ademais, compráceme que poidamos contar coa participación activa dos operadores de transporte para contribuír a reforzar a iniciativa".

O novo programa, lanzado para conmemorar o 30 aniversario do programa Erasmus, e coincidindo tamén co 60 aniversario da firma do Tratado de Roma, nace tras ser retirada a proposta de regalar billetes de tren para percorrer Europa aos mozos ao cumprir os 18 anos. Ten un orzamento de 2,5 millóns de euros e busca tamén fomentar a mobilidade sostible entre os mozos da Unión.

Ademas de ALSA, conta coa participación de outros operadores europeos, tanto aéreos como ferroviarios, líderes nos seus respectivos países, como Brussels Airlines, Trenitalia, Aegan Airlines, Deustche Bahn, SNCF e Croatia Airlines, entre outros. Para máis información sobre o programa: http://europa.eu/rapid/press-release_IP-17-724_es.htm

Volver á sala de prensa