ALSA gaña o concurso para a xestión do autobús turístico de Marrakech

A operación realizarase con novos autobuses 100% eléctricos.

Madrid, 13 de abril.- A compañía de transporte de viaxeiros por estrada ALSA informa de que resultou adxudicataria do concurso convocado polo Concello de Marrakech (Marrocos) para a xestión do autobús turístico da cidade durante os próximos seis anos.

Para a súa posta en marcha, a compañía adquirirá catro novos autobuses panorámicos de dous pisos, que como novidade serán 100% eléctricos, e creará 16 postos de traballo. Está previsto que o servizo sexa utilizado por máis de 90.000 turistas ao ano.

Marrakech é a capital turística do Reino de Marrocos e recibe tres millóns de visitantes ao ano. ALSA está presente na cidade desde 1999, xestionando o transporte urbano e, posteriormente, tamén o da súa área metropolitana. En 2005 puxo en marcha o autobús turístico. Ademais de Marrakech, ALSA opera o transporte urbano doutras tres cidades marroquíes: Agadir (desde 2010), Tánxer (desde 2013) e Khouribga, desde 2015.

Con esta nova adxudicación, ALSA dá continuidade á súa estratexia de crecemento en Marrocos, onde grazas ao recoñecemento de administracións e cidadáns goza dunha excelente reputación como operador, e onde espera seguir ampliando a súa presenza no futuro.

Volver á sala de prensa